ಶಿವಯೋಗ - ಪಾಸಿಟಿವ್ ತಮ್ಮಯ್ಯ

1951-52ರಲ್ಲಿ ಮಾಜಿ ಸೈನಿಕರ 2ನೇ ಗ್ರಾಮವಾಗಿ ಚೌಡಿಕಟ್ಟೆ ಆರಂಭವಾಯಿತು. ಇಲ್ಲಿ ತಂದೆಯವರಿಗೆ ಮಾಜಿ ಸೈನಿಕರ ಕೋಟಾದಲ್ಲಿ ಸರ್ಕಾರದಿಂದ ಭೂಮಿ ಮಂಜೂರಾಯಿತು. ಆಗಿನಿಂದಲೂ ಇವರು ಕೃಷಿ ಮಾಡುತ್ತಾ ಬಂದಿದ್ದು, 1980ರಿಂದ ರಾಸಾಯನಿಕ ಕೃಷಿ ಪದ್ಧತಿ ಬಿಟ್ಟು ಸಹಜ ಕೃಷಿ ಪದ್ಧತಿಯಲ್ಲಿ ವ್ಯವಸಾಯ ಮಾಡಲು ತಮ್ಮ ತಂದೆಯವರನ್ನು ಮಾತೃಶ್ರೀ ಮುಖೇನ ಒಪ್ಪಿಸಿದರು. ಕ್ರಮೇಣ ಅವರ ಭೂಮಿಯನ್ನು ಸಹಜ ಕೃಷಿಗೆ ಬದಲಾಯಿಸಿದರು. ಶ್ರೀಯುತರು ತಮ್ಮ ಒಂಟಿ ಬದುಕಿನಲ್ಲಿಯೂ ಅಂದಿನಿಂದ ಇಂದಿನವರೆಗೆ ಸಹಜ ಕೃಷಿಯನ್ನು ಯಶಸ್ವಿಯಾಗಿ ಮಾಡುತ್ತಾ ಬಂದಿರುತ್ತಾರೆ.

ಹುಣಸೂರು ನಗರದಲ್ಲಿ ಒಂದು ಯೋಗ ಶಾಲೆಯನ್ನು ಸಹಾ ಪ್ರಾರಂಭಿಸಿದರು. ಅದು ಈಗಲೂ ಚಾಲ್ತಿಯಲ್ಲಿದೆ. ಇಲ್ಲಿ ಅನೇಕರು ಇಂದಿಗೂ ಯೋಗ ಹಾಗೂ ಪ್ರಾಣಯಾಮಗಳನ್ನು ದಿನಂಪ್ರತಿ ಅಭ್ಯಸಿಸುತ್ತಿದ್ದಾರೆ. ಇದರಿಂದ ಸಾವಿರಾರು ಜನರಿಗೆ ಪ್ರಯೋಜನವಾಗಿದೆ. ನಾಡೋಜ ಎಲ್. ನಾರಾಯಣರೆಡ್ಡಿಯವರ ನೈಸರ್ಗಿಕ ಕೃಷಿ ಪದ್ಧತಿಯಿಂದಲೂ ತಮ್ಮಯ್ಯರವರು ಪ್ರಭಾವಿತರಾಗಿ ಅವರಿಂದಲೂ ತಿಳಿಯಲ್ಪಟ್ಟ ಅನೇಕ ನೈಸರ್ಗಿಕ ಕೃಷಿ ವಿಧಾನಗಳನ್ನು ತಾನೊಬ್ಬನೇ ಅನುಸರಿಸುವುದು ಸರಿಯಲ್ಲವೆಂದೆನಿಸಿ, ಇತರರಿಗೂ ಈ ಕೃಷಿ ಜ್ಞಾನವನ್ನು ಧಾರೆ ಎರೆಯಬೇಕೆಂದು ಅವರು ನಿರ್ಧರಿಸಿದರು. ಇದರೊಂದಿಗೆ ತಮ್ಮ ಗುರುಗಳಾದ ಮಲ್ಲಾಡಿಹಳ್ಳಿ ಶ್ರೀ ರಾಘವೇಂದ್ರಸ್ವಾಮಿಗಳವರಿಂದ ಕಲಿತ ಆರೋಗ್ಯ ಹಾಗೂ ಯೋಗ ವಿದ್ಯೆಯನ್ನು ಹೆಚ್ಚು ಹೆಚ್ಚು ಪ್ರಚಲಿತಗೊಳಿಸಬೇಕೆಂದು ಪಣತೊಟ್ಟರು. ಇದರ ನಿಮಿತ್ತವೇ ಅವರ ಕೃಷಿ ಭೂಮಿಯ ಒಂದು ಭಾಗದಲ್ಲಿ “ವಿಶ್ವ ಆರೋಗ್ಯ ಯೋಗ ಕೇಂದ್ರ”, “ಶಿವಯೋಗ ದೇಸೀ ಗೋ ಶಾಲೆ”, “ಎತ್ತಿನ ಎಣ್ಣೆಗಾಣದ ಘಟಕ”, “ಆರು ಮಧ್ಯಮ ಗಾತ್ರದ ಕೃತಕ ಕೆರೆಗಳು” ಹಾಗೂ ಒಂದು ಎಕರೆ “ಮಾದರಿ ತೋಟವನ್ನು ಹಂತ ಹಂತವಾಗಿ ಅಭಿವೃದ್ಧಿಪಡಿಸುತ್ತಾ ಬಂದರು.

ಇಂದಿಗೂ ತಿಂಗಳಲ್ಲಿ ಒಂದು ದಿವಸ (2ನೇ ಭಾನುವಾರ) ನಿಗದಿಪಡಿಸಿಕೊಂಡು ನಿರಂತರವಾಗಿ ಆಸಕ್ತರಿಗೆ “ನೈಸರ್ಗಿಕ/ಸಹಜ ಕೃಷಿ ಹಾಗೂ ಆರೋಗ್ಯ ಸಂರಕ್ಷಣೆ” ವಿಷಯದಲ್ಲಿ ಒಂದು ಕಾರ್ಯಾಗಾರವನ್ನು ನಡೆಸಿಕೊಂಡು ಬರುತ್ತಿದ್ದಾರೆ. ತಮ್ಮ ತೋಟವನ್ನು ಭೇಟಿ ಮಾಡಲು ಬರುವ ನೂತನ ರೈತಾಪಿಗಳಿಗೆ ಕೃಷಿ ಮಾರ್ಗದರ್ಶನ ನೀಡುವುದರ ಜೊತೆಗೆ ಪ್ರಕೃತಿ ಚಿಕಿತ್ಸೆ ಮತ್ತು ಯೋಗ ಕ್ಷೇತ್ರದಲ್ಲಿ ಪಡೆದ ಪ್ರಾವೀಣ್ಯತೆಯನ್ನು ಜನರುಗಳಿಗೆ ಹೇಳಿಕೊಡುತ್ತಿದ್ದಾರೆ. ಜಿಲ್ಲೆಯ ಸುತ್ತಮುತ್ತಲಿನ ಹಾಗೂ ಇತರೆ ಜಿಲ್ಲೆಗಳ ಅನೇಕ ಶಾಲಾ-ಕಾಲೇಜು ವಿದ್ಯಾರ್ಥಿಗಳು ಕೂಡ ತಂಡ ತಂಡವಾಗಿ ಇವರ ತೋಟಕ್ಕೆ ಬಂದು ಹೋಗುತ್ತಿರುತ್ತಾರೆ. ನಗರ ಜೀವನ ಹಾಗೂ ಕಾರ್ಪೊರೇಟ್ ವೃತ್ತಿಯ ಒತ್ತಡಗಳಿಗೆ ಸಿಲುಕಿ ಬೇಸತ್ತು ಆರೋಗ್ಯ ಸಮಸ್ಯೆಗಳಿಂದ ಬಾಧಿತರಾಗಿರುವ; ಗ್ರಾಮೀಣ ಪರಿಸರದಲ್ಲಿ ಜೀವನ ಸಾಗಿಸುವ ಆಸೆಯಿಂದ ಬಹಳಷ್ಟು ಮಂದಿ ಶಿವಯೋಗ ಸಹಜ ಕೃಷಿ ಹಾಗೂ ಕ್ಷೇಮ ತರಬೇತಿಯಲ್ಲಿ ಭಾಗವಹಿಸುತ್ತಿದ್ದಾರೆ.